ଆଇଏଲ୍ଏସ୍‌ ହେବ ନୂଆ କୋଭିଡ୍-୧୯ ପରୀକ୍ଷା କେନ୍ଦ୍ର

ଭୁବନେଶ୍ବର: ରାଜ୍ୟରେ ଅନ୍ୟ ଏକ ଅନୁଷ୍ଠାନରେ ହେବ କୋଭିଡ-୧୯ର ପରୀକ୍ଷା କେନ୍ଦ୍ର। ଏ ନେଇ ଭାରତ ସରକାରଙ୍କ ବାୟୋଟେକ୍ନୋଲୋଜି ବିଭାଗ ପକ୍ଷରୁ ଅନୁମତି ମିଳିଛି। ଇନଷ୍ଟିଚ୍ୟୁଟ୍ ଅଫ୍ ଲାଇଫ୍ ସାଇନ୍ସ (ଆଇଏଲ୍ଏସ୍)ରେ ଆସନ୍ତା ସପ୍ତାହରୁ କୋଭିଡ୍-୧୯ର ପରୀକ୍ଷା ଆରମ୍ଭ କରିବାକୁ ଯାଉଛି। ଏ ନେଇ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଟ୍ବିଟ୍ କରି ସୂଚନା ଦିଆଯାଇଛି। ଏଥିସହ ଆଇଏଲ୍ଏସ୍ ନିର୍ଦ୍ଦେଶକ ଟ୍ବିଟ୍ ମାଧ୍ୟମରେ ମୁଖ୍ୟ ସ୍ବାସ୍ଥ୍ୟ ସଚିବ ନିକୁଞ୍ଜା ଧଳଙ୍କୁ ସୂଚନା ଦେଇଛନ୍ତି। କୋଭିଡ୍‌-୧୯ର ପରୀକ୍ଷା କରିବା ପାଇଁ ଭାରତ ସରକାରଙ୍କ ବାୟୋଟେକ୍ନୋଲୋଜି ବିଭାଗର ଅନୁମତି ପାଇଛନ୍ତି।ଏପର୍ୟ୍ୟନ୍ତ ଆରଏମଆରସି, ଭୁବନେଶ୍ୱର, ଏଆଇଏମଏସ, ଭୁବନେଶ୍ୱର ଏବଂ କଟକସ୍ଥିତ ଏସସିବି ମେଡିକାଲ କଲେଜ ଏବଂ ହସ୍ପିଟାଲରେ କୋଭିଡ-୧୯ ସନ୍ଦିଗ୍ଧଙ୍କ ନମୁନା ପରୀକ୍ଷା କରାଯାଉଥିଲା। ଓଡିଶାରେ ସମୁଦାୟ କୋଭିଡ-୧୯ ରୋଗୀଙ୍କ ସଂଖ୍ୟା ୪୨ ପହଞ୍ଚି। ସେମାନଙ୍କ ମଧ୍ୟରୁ ୨ ଜଣ ସମ୍ପୂର୍ଣ୍ଣ ସୁସ୍ଥ ଘରକୁ ଫେରିଥିବା ବେଳେ ଅନ୍ୟ ଜଣେ ୭୦ ବର୍ଷୀୟ ବୃଦ୍ଧଙ୍କ ମୃତ୍ୟୁ ହୋଇଛି।