ଜୀବନ ନେଲା ଅନ୍ଲାଇନ୍ ଠକେଇ, ପାରିବାରିକ ସମସ୍ୟା

ଜୀବନ ଲାଞ୍ଜିଗଡ଼,(ବି.ବି.ନୁ୍ୟଜ୍): ଦୁଇଟି ପୃଥକ୍ ଘଟଣାରେ ରେଳ ଧାରଣରୁ ଦୁଇ ଜଣ ଯୁବକଙ୍କ ଖଣ୍ଡବିଖଣ୍ଡିତ ଶବ ଉଦ୍ଧାର ଘଟଣା କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଦୁଇଜଣ ଯାକ ଯୁବକ ରେଳ ଧାରଣାରେ ବେକ ଦେଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଜଣେ ଅନ୍ଲାଇନ୍ ଲଟେରୀ ନିଶାରେ ପଡ଼ି ଠକେଇର ଶିକାର ହୋଇଥିବାରୁ ଏବଂ ଅନ୍ୟ ଜଣକ ପାରିବାରିକ ସମସ୍ୟାକୁ ନେଇ ଆତ୍ମହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । ଜଣେ ଯୁବକ ଲାଞ୍ଜିଗଡ଼ ସହର ବଜାରପଡ଼ାର ପ୍ରତାପ ବାରିକ (୨୦) ବୋଲି ଚିହ୍ନଟ କରାଯାଇଥିବାବେଳେ ଅନ୍ୟ ଜଣେ ବରଙ୍ଗପୁର ଜିଲ୍ଲା ମଇଦଲପୁରର ଏସ୍. ଗଣପତି ଦୋରା ବୋଲି ଚିହ୍ନଟ କରାଯାଇଛି । ମୃତୁ୍ୟ ପୂର୍ବରୁ ପ୍ରତାପ ଆତ୍ମହତ୍ୟା କରିବାକୁ ଯାଉଥିବା ନେଇ ନିଜର ଏକ ଭିଡିଓ ମଧ୍ୟ ପ୍ରସ୍ତୁତ କରିଛନ୍ତି, ଯାହାକୁ ନେଇ ଏବେ ଚର୍ଚ୍ଚା ।
ଦକ୍ଷିଣପୂର୍ବ ରେଳପଥ, ସମ୍ବଲପୁର ଡିଭିଜନ, ରାୟପୁର-ବିଶାଖାପାଟଣା ରେଳ ଲାଇନ ଟିଟିଲାଗଡ଼ ନିକଟରେ ପ୍ରତାପଙ୍କ ଶବ ଉଦ୍ଧାର କରାଯାଇଥିବାବେଳେ ଏହି ରେଳପଥ ଲାଞ୍ଜିଗଡ଼ ରୋଡ ରେଳ ଷ୍ଟେସନର ୧୪୯/୧୧-୧୨ ଖୁଣ୍ଟି ପାଖରେ ଗଣପତିଙ୍କ ଖଣ୍ଡ ବିଖଣ୍ଡିତ ମୃତଦେହକୁ ଉଦ୍ଧାର କରିଛି ଟିଟିଲାଗଡ ଜିଆର୍ପି ପୁଲିସ । ଜିଆର୍ପି ସୂଚନା ଅନୁଯାୟୀ, ପ୍ରତାପ ତିନିଦିନ ହେଲା ନିଖୋଜ ଥିଲେ । ଆଜି ସକାଳୁ ଟିଟିଲାଗଡ ରେଳ ଷ୍ଟେସନ ପାଖାପାଖି ରେଳଧାରଣାରେ ତାଙ୍କର ମୃତଦେହ ଦେଖିବାକୁ ମିଳିଥିଲା । କୌଣସି ଏକ ଦ୍ରୁତଗାମୀ ଟ୍ରେନରେ କଟି ତାଙ୍କର ମୃତୁ୍ୟ ହୋଇଥିବା ଅନୁମାନ କରାଯାଉଛି । ମୃତ ପ୍ରତାପଙ୍କ ମୋବାଇଲରୁ ମିଳିଥିବା ଏକ ଭିଡିଓରୁ ଏହା ଆତ୍ମହତ୍ୟା ବୋଲି ଜଣାପଡିଛି । ଏହି ଭିଡିଓରେ ସେ ଅନଲାଇନ୍ ଠକେଇର ଶିକାର ହୋଇଥିବା ସ୍ପଷ୍ଟ କରିଛନ୍ତି । ରାଣାପ୍ରତାପ ସିଂହ ନାମକ ଜଣେ ବ୍ୟକ୍ତି କୌନ ବନେଗା କରୋଡ଼ପତିରେ ଲଟେରୀ ଜିଣିଥିବା ଦର୍ଶାଇ ତାଙ୍କଠାରୁ ବିଭିନ୍ନ ଦଫାରେ ୩୦ ହଜାରରୁ ଅଧିକ ଟଙ୍କା ନେଇଯାଇଥିଲେ । ଫଳରେ ନିରାଶ ହୋଇ ଆତ୍ମହତ୍ୟା କରିଥିବା ସେ ଭିଡିଓରେ ଉଲ୍ଲେଖ କରିଛନ୍ତି । ଜିଆର୍ପି ଏବେ ଶବ ଉଦ୍ଧାର କରିବା ସହ ଉକ୍ତ ମୋବାଇଲ ମଧ୍ୟ ଉଦ୍ଧାର କରିଛି । ଘଟଣାର ତଦନ୍ତ ଚାଲିଥିବା ପୁଲିସ କହିଛି । ସେପଟେ ଖବର ପାଇ ତାଙ୍କ ପରିବାର ଲୋକେ ଟିଟିଲାଗଡ଼ ପହଞ୍ଚିଥିବା ସୂଚନା ମିଳିଛି ।
ସେହିପରି ନବରଙ୍ଗପୁର ଜିଲ୍ଲା ମଇଦଲପୁରର ଏସ୍. ଗଣପତି ଦୋରା ଦୁଇ ତାରିଖରୁ ଭୋଜି କରିବାକୁ ଯାଉଛି କହି ଘରୁ ବାହାରି ଆଉ ଫେରି ନଥିଲେ । ଘରୁ ଯିବାବଳେ ନିଜର ସ୍କୁଟିକୁ ଜଣେ ବନ୍ଧୁଙ୍କୁ ଦେଇ ସେ କୁଆଡେ଼ ଚାଲି ଯାଇଥିଲେ । ଗତ ୧୪ ତାରିଖ ସେ ପିନ୍ଧିଥିବା ଦୁଇଟି ସୁନାମୁଦିକୁ କୋରିୟର ଯୋଗେ ଘରକୁ ପଠାଇଦେଇଥିବା ପରିବାର ଲୋକେ କହିଛନ୍ତି । ତେବେ ପରିବାର ଲୋକେ ଖୋଜାଖୋଜି ସତ୍ତେ୍ୱ ତାଙ୍କୁ ପାଇନଥିବାବଳେ ଆଜି ସକାଳୁ ଲାଞ୍ଜିଗଡ଼ ରୋଡ ଷ୍ଟେସନରେ ତାଙ୍କର ମୃତଦେହ ପଡିଥିବା ଦେଖିବାକୁ ମିଳିଥିଲା । ମାର୍ଚ୍ଚରେ ତାଙ୍କର ବିବାହ ଠିକ୍ ହୋଇଥିବାବେଳେ ନିର୍ବନ୍ଧ ମଧ୍ୟ ସରିଥିଲା । ତେବେ କୌଣସି ପାରିବାରିକ ସମସ୍ୟା ଯୋଗୁଁ ସେ ଆତ୍ମହତ୍ୟା କରିଥିବା ସନେ୍ଦହ କରାଯାଉଛି । ଏ ନେଇ ଟିଟିଲାଗଡ଼ ଜିଆର୍ପି ଥାନାରେ ଦୁଇଟି ପୃଥକ୍ ପୃଥକ୍ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ଏସ୍ଆଇ ରମେଶ ପାତ୍ର ସୂଚନା ଦେଇଛନ୍ତି ।ନେଲା ଅନ୍ଲାଇନ୍ ଠକେଇ, ପାରିବାରିକ ସମସ୍ୟା