ପରପାରିରେ ଟ୍ରାଜେଡି କିଙ୍ଗ୍

ମୁମ୍ବାଇ: ପରଲୋକରେ ଟ୍ରାଜେଡି କିଙ୍ଗ୍ । ଭାରତୀୟ ସିନେମା ଜଗତର ସର୍ବଶ୍ରେÂ ସମ୍ମାନ ଦାଦା ସାହେବ ଫାଲ୍କେ ପୁରସ୍କାରରେ ସମ୍ମାନିତ, ସର୍ବକାଳୀନ ଲୋକପ୍ରିୟ ଫିଲ୍ମ ‘ମୁଗଲ-ଏ-ଆଜମ୍’ର ନାୟକ ତଥା ବର୍ଷୀୟାନ୍ ବଲିଉଡ୍ ଅଭିନେତା ଦିଲ୍ଲୀପ କୁମାର ଆଉ ନାହାନ୍ତି । ବୁଧବାର ସକାଳ ୭.୩୦ ମିନିଟ୍ରେ ସବୁଦିନ ପାଇଁ ଦୁନିଆକୁ ଅଲ୍ବିଦା କହିଛନ୍ତି । ମୃତୁ୍ୟ ବେଳକୁ ତାଙ୍କୁ ୯୮ ବର୍ଷ ହୋଇଥିଲା । ତାଙ୍କ ଦେହାନ୍ତ ସହ ହିନ୍ଦୀ ସିନେମାର ଏକ ଯୁଗର ଅନ୍ତ ଘଟିଛି ।
ଦୀର୍ଘ ଦିନ ଧରି ତାଙ୍କ ସ୍ୱାସ୍ଥ୍ୟାବସ୍ଥା ଠିକ୍ ନଥିଲା । ତାଙ୍କୁ ଅନେକ ଥର ହସ୍ପିଟାଲରେ ଭର୍ତ୍ତି ହେବାକୁ ପଡ଼ିଥିଲା । ଗତ ମାସକ ମଧ୍ୟରେ ସେ ଦୁଇଥର ହସ୍ପିଟାଲରେ ଭର୍ତ୍ତି ହୋଇଥିଲେ । ଶେଷଥର ପାଇଁ ଶ୍ୱାସକ୍ରିୟାରେ ସମସ୍ୟା ହେବାରୁ ଦିଲ୍ଲୀପ କୁମାରଙ୍କୁ ଜୁନ୍ ୨୯ ତାରିଖରେ ମୁମ୍ବାଇର ହିନ୍ଦୁଜା ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଆଜି ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ଏହାପରେ ତାଙ୍କ ପାର୍ଥିବ ଶରୀରକୁ ପାଲିହିଲ୍ସ୍ଥିତ ଘରକୁ ଅଣାଯାଇଥିଲା । ସେଠାରେ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ, ଏନ୍ସିପି ମୁଖ୍ୟ ଶରଦ ପାୱାର, ଅଭିନେତା ଶାହରୁଖ୍ ଖାନ୍, ଧର୍ମେନ୍ଦ୍ର, ଅନୁପମ ଖେର, କରଣ ଜୋହର, ବିଦ୍ୟା ବାଲାନଙ୍କ ପରି ଅନେକ ସେଲିବ୍ରିଟି ପହଞ୍ଚି ତାଙ୍କର ଶେଷ ଦର୍ଶନ କରିବା ସହ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ଏହାପରେ ଜୁହୁସ୍ଥିତ ଶ୍ମଶାନରେ ସନ୍ଧ୍ୟା ୫ଟାରେ ତାଙ୍କୁ ସୁପୁର୍ଦ-ଏ-ଖାକ୍ କରାଯାଇଥିଲା । ପତ୍ନୀ ସାୟରା ବାନୋ ଶେଷ ସମୟ ପର୍ଯ୍ୟନ୍ତ ତାଙ୍କ ସହ ରହିଥିଲେ । ଏମିତି କି ଜୁହୁ ଶ୍ମଶାନ ପର୍ଯ୍ୟନ୍ତ ଯାଇ ତାଙ୍କୁ ଅଶ୍ରୁଳ ବିଦାୟ ଦେଇଥିଲେ । ମହାରାଷ୍ଟ୍ର ସରକାର ତାଙ୍କୁ ରାଷ୍ଟ୍ରୀୟ ସମ୍ମାନ ସହ ଅନ୍ତିମ ବିଦାୟ ଦେଇଛନ୍ତି ।
ଦିଲ୍ଲୀପ କୁମାରଙ୍କ ପ୍ରକୃତ ନାମ ଥିଲା ମହମ୍ମଦ ୟୁସୁଫ୍୍ ଖାନ୍ । ୧୯୨୨ ଡିସେମ୍ବର ୧୧ରେ ବ୍ରିଟିଶ ଇଣ୍ଡିଆର ପେଶାୱର(ବର୍ତ୍ତମାନ ପାକିସ୍ତାନ)ରେ ତାଙ୍କର ଜନ୍ମ ହୋଇଥିଲା । ସେ ନାସିକରେ ପାଠପଢ଼ା ସମାପ୍ତ କରିଥିଲେ । ମାତ୍ର ୨୨ ବର୍ଷର ହୋଇଥିବା ବେଳେ ତାଙ୍କୁ ପ୍ରଥମ ଫିଲ୍ମ ‘ଜ୍ୱାର-ଭଟ୍ଟା’ ମିଳିଥିଲା । ତାହା କିନ୍ତୁ ସେତେ ସଫଳ ହୋଇପାରି ନ ଥିଲା । ଦ୍ୱିତୀୟ ଫିଲ୍ମ ‘ପ୍ରତିମା’ ବି ଫ୍ଲପ୍ ହୋଇଥିଲା । ଏହାପରେ ତାଙ୍କ ଅଭିନୟକୁ ନେଇ ସମାଲୋଚନା କରାଯାଇଥିଲା । ତେଣୁ ସେ ଅଭିନୟକୁ ଗୁରୁତ୍ୱ ଦେବା ଆରମ୍ଭ କଲେ । ତାଙ୍କର ତୃତୀୟ ଫିଲ୍ମ ‘ମିଲନ୍’ ବକ୍ସ ଅଫିସ୍ରେ ହିଟ୍ ହେଲା । ସେହି ବର୍ଷ ତାଙ୍କର ଚତୁର୍ଥ ଫିଲ୍ମ ‘ଜୁଗ୍ନୁ’ ରିଲିଜ୍ ହେବା ସହ ବକ୍ସ ଅଫିସ୍ରେ ଭଲ ରେକର୍ଡ କଲା । ସେବେଠାରୁ ସେ ଆଉ ପଛକୁ ଚାହିଁନାହାନ୍ତି । ‘ଶହିଦ୍’, ‘ମେଲା’, ‘ନଦିୟା କେ ପାର୍’, ‘ବାବୁଲ’, ‘ଫୁଟପାଥ୍’, ‘ଦେବଦାସ’, ‘ନୟା ଦୌର’, ‘ମୁଗଲ-ଏ-ଆଜମ୍’, ‘ଗଙ୍ଗା-ଯମୁନା’, ‘ରାମ ଔର ଶ୍ୟାମ୍’, ‘ବିଧାତା’, ‘ସୌଦାଗର’, ‘କର୍ମା’ ପ୍ରଭୃତି ତାଙ୍କର ଉଲ୍ଲେଖନୀୟ ଫିଲ୍ମ ମଧ୍ୟରୁ ଅନ୍ୟତମ । ୧୯୯୮ ମସିହାରେ ତାଙ୍କର ଶେଷ ଫିଲ୍ମ ‘କିଲ୍ଲା’ ରିଲିଜ୍ ହୋଇଥିଲା ।
ଅଭିନୟ ପ୍ରତି ସମର୍ପିତ ଏହି ପ୍ରତିଭାଙ୍କୁ ମିଳିଥିବା ପୁରସ୍କାର ଓ ସମ୍ମାନର ତାଲିକା ଖୁବ୍ ଲମ୍ବା । ତାଙ୍କୁ ଭାରତୀୟ ସିନେମା ଜଗତର ସର୍ବଶ୍ରେÂ ସମ୍ମାନ ଦାଦା ସାହେବ ଫାଲ୍କେ ପୁରସ୍କାରରେ ସମ୍ମାନିତ କରାଯାଇଥିଲା । ଏହାଛଡ଼ା ପଦ୍ମବିଭୂଷଣ, ପଦ୍ମଭୂଷଣ ସମ୍ମାନ ବି ମିଳିଥିଲା । ପାକିସ୍ତାନ ସରକାର ତାଙ୍କୁ ସର୍ବୋଚ୍ଚ ନାଗରିକ ସମ୍ମାନ ‘ନିଶାନ୍ ଏ ଇମ୍ତିଆଜ୍’ ପ୍ରଦାନ କରିଥିଲେ । ସର୍ବଶ୍ରେÂ ଅଭିନେତା ଭାବେ ଫିଲ୍ମଫେୟାର ପୁରସ୍କାର ପାଇବାରେ ଦିଲ୍ଲୀପ କୁମାର ପ୍ରଥମ ଅଭିନେତା ଥିଲେ । ନିଜର ଫିଲ୍ମ କ୍ୟାରିୟର ମଧ୍ୟରେ ସେ ୧୦ ଥର ଏହି ପୁରସ୍କାର ଜିତିଥିଲେ । ୨୦୦୦-୨୦୦୬ ମସିହା ଯାଏ ରାଜ୍ୟସଭାର ସାଂସଦ ବି ଥିଲେ । ଫିଲ୍ମ ଜଗତକୁ ତାଙ୍କର ଜୀବନବ୍ୟାପୀ ଅବଦାନ ପାଇଁ ୨୦୦୬ରେ ଦିଲ୍ଲୀପଙ୍କୁ ସ୍ୱତନ୍ତ୍ର ପୁରସ୍କାର ବି ମିଳିଥିଲା ।
ସେ ନିଜଠାରୁ ୨୨ ବର୍ଷ ସାନ ସାୟରା ବାନୋଙ୍କୁ ବିବାହ କରିଥିଲେ । କିଛି ବର୍ଷ ପରେ ଅନ୍ୟଜଣେ ପାକିସ୍ତାନୀ ମହିଳା ଅସମାଙ୍କ ସହ ବିବାହ ବନ୍ଧନରେ ଆବଦ୍ଧ ହୋଇଥିଲେ । କିନ୍ତୁ ୨ ବର୍ଷ ପରେ ଅସମାଙ୍କୁ ତଲାକ ଦେଇ ସେ ପୁଣିଥରେ ସାୟରାଙ୍କ ପାଖକୁ ଫେରିଆସିଥିଲେ । ଦୀର୍ଘ ଦିନ ଧରି ଅସୁସ୍ଥ ଥିବା ଦିଲ୍ଲୀପ କୁମାରଙ୍କ ସମସ୍ତ ପ୍ରକାର ଯତ୍ନ ସାୟରା ହିଁ ନେଉଥିଲେ । ଏହି ଦମ୍ପତିଙ୍କର କୌଣସି ସନ୍ତାନସନ୍ତତି ନାହାନ୍ତି । ଏହା ପୂର୍ବରୁ ଗତବର୍ଷ କରୋନା ଯୋଗୁ ତାଙ୍କ ଦୁଇ ଭାଇଙ୍କର ପରଲୋକ ହୋଇଥିଲା ।
ଦିଲ୍ଲୀପ କୁମାରଙ୍କ ପରଲୋକରେ ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପାକ୍ ପ୍ରଧାନମନ୍ତ୍ରୀ ଇମରାନ୍ ଖାନ୍, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ସ୍ୱରସାମ୍ରାଜ୍ଞୀ ଲତା ମଙ୍ଗେସକର, ଅଭିନେତା ଧର୍ମେନ୍ଦ୍ର, ଅମିତାଭ ବଚ୍ଚନ ଓ ଅନେକ ବଲିଉଡ୍ ସେଲିବ୍ରିଟି ଶୋକ ପ୍ରକାଶ କରିଛନ୍ତି । ଦିଲ୍ଲୀପଙ୍କ ପତ୍ନୀ ସାୟରା ବାନୋଙ୍କ ସହ ଫୋନ୍ରେ କଥା ହୋଇ ପ୍ରଧାନମନ୍ତ୍ରୀ ଶୋକ ତଥା ସମବେଦନା ବ୍ୟକ୍ତ କରିଛନ୍ତି । ଏଥିସହ ସୋସିଆଲ ମିଡିଆରେ ଲେଖିଛନ୍ତି, ‘ଦିଲ୍ଲୀପ କୁମାରଜୀ ସିନେମା ଲିଜେଣ୍ଡ ଭାବେ ସବୁବେଳେ ମନେ ରହିବେ । ତାଙ୍କର ବିୟୋଗ ଆମ ସାଂସ୍କୃତିକ ଦୁନିଆ ପାଇଁ ଏକ ଅପୂରଣୀୟ କ୍ଷତି ।’