ଫିଲ୍ମ କରିବେ ‘ପବିତ୍ର ରିସ୍ତା’ ଅଭିନେତ୍ରୀ

ଲୋକପ୍ରିୟ ହିନ୍ଦୀ ଧାରାବାହିକ ‘ପବିତ୍ର ରିସ୍ତା’ର ଅଭିନେତ୍ରୀ ଆଶା ନେଗି ପ୍ରଯୋଜକ ଅନୁରାଗ ବାସୁଙ୍କ ଫିଲ୍ମ ମାଧ୍ୟମରେ ବଲିଉଡ୍ରେ ପ୍ରବେଶ କରିବାକୁ ଯାଉଛନ୍ତି । ଫିଲ୍ମର ନାମ ‘ମେଟ୍ରୋ ୨’ । ଏହି ଫିଲ୍ମରେ ଆଶା ଅଭିନେତା ଅଭିଷେକ ବଚ୍ଚନଙ୍କ ସହ ରୋମାନ୍ସ କରୁଥିବା ଦର୍ଶକ ଦେଖିବାକୁ ପାଇବେ । ଫିଲ୍ମର ସୁଟିଂ ମଧ୍ୟ ଆରମ୍ଭ ହୋଇଗଲାଣି । ଆଶା ଏବଂ ଅଭିଷେକଙ୍କ ଛଡ଼ା ଏହି ଫିଲ୍ମରେ ଅଭିନେତା ରାଜକୁମାର ରାଓ ନଜର ଆସିବେ । ଫିଲ୍ମରେ ଆଶା ମୁଖ୍ୟ ଚରିତ୍ରରେ ରହିଛନ୍ତି । ଆଶାଙ୍କୁ ଶେଷ ଥର ପାଇଁ ଧାରାବାହିକ ‘କୁଛ ତୋ ହୈ ତେରେ ମେରେ ଦରମିୟା’ରେ ଦର୍ଶକ ଦେଖିବାକୁ ପାଇଥିଲେ । ଏହାର ୩ ବର୍ଷ ପରେ ଆଶା ଏକ ୱେବ ସିରିଜ୍ କରିଥିଲେ । ତେବେ ଆଶାଙ୍କ ଟିଭି ଧାରାବାହିକ ଜୀବନ ବେଶ୍ କିଛି ଦିନ ଭଲ ଚାଲିଥିଲା । ପରେ ତାଙ୍କର ଦୁଇଟି ଧାରାବାହିକର ସୁଟିଂ ଅଧାରୁ ବନ୍ଦ ହୋଇଯାଇଥିଲା । କାରଣ ସେହି ଧାରାବାହିକର ଟିଆର୍ପି (ଟେଲିଭିଜନ୍ ରେଟିଂ ପଏଣ୍ଟ) ଭଲ ହୋଇନଥିଲା । ଏହି କାରଣରୁ ସେ ଡିପ୍ରେସନ୍ରେ ଚାଲିଯାଇ କ୍ୟାମେରା ଆଗକୁ ଆସିବାକୁ ଡରୁଥିଲେ ବୋଲି ଆଶା ଏକ ରିପୋର୍ଟରେ ପ୍ରକାଶ କରିଛନ୍ତି । ଫିଲ୍ମରେ ଅଭିନୟ କରିବା ନେଇ ସେ ଖୁସିରେ କହିଛନ୍ତି, ବିନା ସଂଘର୍ଷରେ ମୁଁ ଧାରାବାହିକ ପବିତ୍ର ରିସ୍ତାରେ କାମ କରିବାର ସୁଯୋଗ ପାଇଥିଲି । ଏହି ଧାରାବାହିକ ପରେ ସଂଘର୍ଷ କ’ଣ ମୁଁ ଜାଣିବାକୁ ପାଇଲି । ମୁଁ ମୋର ଜୀବନରେ ବହୁତ ଖରାପ ସମୟ ଦେଇ ଗତି କରିଛି । ଭଗବାନ ମୋତେ ଏହି ସୁଯୋଗ ଦେଇଛନ୍ତି । ଏହି ସୁଯୋଗ ମାଧ୍ୟମରେ ଦର୍ଶକଙ୍କ ମନକୁ ପୁଣି ଥରେ ଜିତିବାକୁ ଚେଷ୍ଟା କରିବି । ସୂଚନା ଥାଉଯେ, ଅନୁରାଗ ବାସୁଙ୍କ ଫିଲ୍ମ ‘ମେଟ୍ରୋ’ ୨୦୦୭ରେ ମୁକ୍ତିଲାଭ କରିଥିଲା । ତାହା ଏକ ମଲ୍ଟି ଷ୍ଟାରେର୍ ଫିଲ୍ମ ଥିଲା । ଅର୍ଥାତ୍ ସେହି ଫିଲ୍ମରେ ବହୁ କଳାକାର ଅଭିନୟ କରିଥିଲେ ।