ଫୋନ୍ ଟ୍ୟାପିଙ୍ଗ୍ ପ୍ରସଙ୍ଗ:ପୁଣି ମମତା-ଧନଖଡ଼ ବିବାଦ

କୋଲକାତା: ଫୋନ୍ ଟ୍ୟାପିଙ୍ଗ୍ ପ୍ରସଙ୍ଗକୁ ନେଇ ସୋମବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ଜୋରଦାର ବର୍ଷିଛନ୍ତି ରାଜ୍ୟପାଳ ଜଗଦୀପ ଧନଖଡ଼ । ରାଜ୍ୟର ବ୍ୟବସାୟୀ, ସରକାରୀ ଅଧିକାରୀ ଏବଂ ରାଜନେତାଙ୍କ ଫୋନ୍ ଟ୍ୟାପ୍ ହେବା ନେଇ ଖବର ପ୍ରକାଶ ପାଉଥିବା ବେଳେ ମୁଖ୍ୟମନ୍ତ୍ରୀ ମମତା ଓଲଟା କେନ୍ଦ୍ର ଉପରେ ଅଙ୍ଗୁଳି ଉଠାଇବା ପରିତାପର ବିଷୟ ବୋଲି ସେ କହିଛନ୍ତି ।
ସାମ୍ବାଦିକଙ୍କ ପ୍ରଶ୍ନର ଉତ୍ତରରେ ରାଜ୍ୟପାଳ ଧନଖଡ଼ କହିଛନ୍ତି, ମମତା କେଉଁ ଭିତ୍ତିରେ କେନ୍ଦ୍ର ବିରୋଧରେ ଫୋନ୍ ଟ୍ୟାପିଙ୍ଗ୍ ଅଭିଯୋଗ ଆଣିଛନ୍ତି, ତାହା ସେ ହିଁ ଜାଣିଥିବେ । ତାଙ୍କ ପାଖରେ ପ୍ରମାଣ ଅଛି କି ତାଙ୍କୁ ଜଣା ଥିବ । କିନ୍ତୁ କେନ୍ଦ୍ର ସରକାରଙ୍କ ଉପରେ କାଦୁଅ ଫିଙ୍ଗିବା ପୂର୍ବରୁ ମମତା ପ୍ରଥମେ ନିଜକୁ ପ୍ରଶ୍ନ ପଚାରିବା ଆବଶ୍ୟକ । ରାଜ୍ୟର ଅନେକ ବ୍ୟବସାୟୀ, ସରକାରୀ ଅଧିକାରୀ, ରାଜନେତା ଏବଂ କିଛି ପ୍ରଭାବଶାଳୀ ଲୋକଙ୍କ ଫୋନ୍ ଟ୍ୟାପ୍ କରାଯାଉଛି । ବେଙ୍ଗଲରେ ସେମାନଙ୍କ ଗୋପନୀୟତା ପ୍ରଭାବିତ ହେଉଛି ବୋଲି ସେମାନେ ଖୋଦ ମୋ ନିକଟରେ ଅଭିଯୋଗ କରିଛନ୍ତି । ଏବେ ମମତା ଓଲଟା କେନ୍ଦ୍ର ବିରୋଧରେ ଫୋନ୍ ଟ୍ୟାପିଙ୍ଗ୍ ଅଭିଯୋଗ ଆଣିବା ହାସ୍ୟାସ୍ପଦ ଘଟଣା ।
ରାଜ୍ୟପାଳ ଧନଖଡ଼ ଏଭଳି ବିବୃତି ଦେବା ପରେ ତାଙ୍କୁ ତୃଣମୂଳ କଂଗ୍ରେସ (ଟିଏମ୍ସି) ମହାସଚିବ ପାର୍ଥ ଚାଟାର୍ଜୀ ଟାର୍ଗେଟ୍ କରିଛନ୍ତି । ସେ କହିଛନ୍ତି, ଧନଖଡ଼ ଜଣେ ରାଜନୈତିକ ଦଳର ମୁଖପାତ୍ର ଭାବେ କାର୍ଯ୍ୟ କରୁଥିବା ଭଳି ମନେହେଉଛି । ରାଜ୍ୟରେ ଯେଉଁମାନେ ଫୋନ୍ ଟ୍ୟାପିଙ୍ଗ୍ ବାବଦରେ ତାଙ୍କ ନିକଟରେ ଫେରାଦ ହୋଇଛନ୍ତି, ସେ ତାହାର ତାଲିକା ପ୍ରଦାନ କରନ୍ତୁ । ଏଭଳି ଅଭିଯୋଗ କରୁଥିବା ଲୋକମାନେ ନିଶ୍ଚିତ ବିଜେପିର ହୋଇଥିବେ ।
ଚାଟାର୍ଜୀ ଆହୁରି କହିଛନ୍ତି, ମୁଖ୍ୟମନ୍ତ୍ରୀ ମମତା ବାନାର୍ଜୀ ଯେବେ ବି କେନ୍ଦ୍ର ବିରୋଧରେ କୌଣସି ଅଭିଯୋଗ ଆଣୁଛନ୍ତି, ରାଜ୍ୟପାଳ ଧନଖଡ଼ ତୁରନ୍ତ ତାହାର ଜବାବ ଦେଉଛନ୍ତି । ଏହି କାର୍ଯ୍ୟ ଜଣେ ବିଜେପି ନେତାଙ୍କର ହେବା ଆବଶ୍ୟକ । କିନ୍ତୁ ବିଜେପି ନେତା କିଛି କହିବା ପୂର୍ବରୁ ରାଜ୍ୟପାଳଙ୍କ ମୁହଁରୁ ତାହାର ପ୍ରତିକ୍ରିୟା ପ୍ରଥମେ ପ୍ରକାଶ ପାଉଛି । ସାମ୍ବିଧାନିକ ପଦରେ ରହି ସୁଦ୍ଧା ସେ ଏଭଳି କରିବା ଦୁର୍ଭାଗ୍ୟଜନକ ।
ସାମ୍ବିଧାନିକ ପଦରେ ରହିଥିବାରୁ ରାଜ୍ୟପାଳ ସମସ୍ତଙ୍କୁ ସମାନ ଦୃଷ୍ଟିରେ ଦେଖିବା ଉଚିତ । କିନ୍ତୁ ଧନଖଡ଼ ସେଭଳି କିଛି କରୁନାହାନ୍ତି । ସେ ବିଜେପି ନେତାଙ୍କୁ ଛାଡ଼ି ଅନ୍ୟ ସମସ୍ତଙ୍କୁ ଟାର୍ଗେଟ୍ କରୁଛନ୍ତି । ରାଜ୍ୟ ବିଜେପି ସଭାପତି ଦିଲୀପ ଘୋଷଙ୍କ ବିବୃତି ଉପରେ ସେ କାହିଁକି ପ୍ରତିକି୍ରୟା ରଖୁନାହାନ୍ତି? ତେବେ ବେଙ୍ଗଲ ଲୋକମାନେ ବେଶ୍ ବୁଦ୍ଧିମାନ । ରାଜ୍ୟପାଳ ଧନଖଡ଼ କ’ଣ ପାଇଁ ଏଭଳି କରୁଛନ୍ତି, ତାହା ସେମାନେ ନିଶ୍ଚିତ ବୁଝିପାରୁଥିବେ ବୋଲି ଚାଟାର୍ଜୀ ଦର୍ଶାଇଛନ୍ତି ।
ଉଲ୍ଲେଖଯୋଗ୍ୟ, ବ୍ୟକ୍ତିଗତ ତଥ୍ୟ ହାସଲ ଉଦେ୍ଧଶ୍ୟରେ ତାଙ୍କ ଫୋନ୍ ଟ୍ୟାପ୍ କରାଯାଉଥିବା ରବିବାର ତୃଣମୂଳ କଂଗ୍ରେସ ସୁପ୍ରିମୋ ମମତା ଅଭିଯୋଗ ଆଣିଥିଲେ । କେନ୍ଦ୍ର ସରକାର ଏବଂ ୨ଟି ରାଜ୍ୟର ସରକାରଙ୍କ ନିଦେ୍ର୍ଧଶରେ ହିଁ ଏଭଳି କରାଯାଉଛି ଏବଂ ଏଥିପାଇଁ ତାଙ୍କ ନିକଟରେ ଯଥେଷ୍ଟ ପ୍ରମାଣ ରହିଛି ବୋଲି ସେ କହିଥିଲେ ।
ମମତା କହିଥିଲେ, ୨ଟି ରାଜ୍ୟର ସରକାରଙ୍କ ନିଦେ୍ର୍ଧଶରେ ତାଙ୍କ ଫୋନ୍ ଟ୍ୟାପ୍ କରାଯାଉଛି । ତନ୍ମଧ୍ୟରୁ ଗୋଟିଏ ରାଜ୍ୟ ବିଜେପି ଶାସିତ । ତେଣୁ ଏହି ମାମଲାର ତୁରନ୍ତ ଯାଞ୍ଚ କରି ସମସ୍ୟାର ସମାଧାନ କରାଯିବା ଆବଶ୍ୟକ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହା ଉପରେ ଗୁରୁତ୍ୱ ଦେଇ ଯାଞ୍ଚ ନିଦେ୍ର୍ଧଶ ଦେବା ଉଚିତ ବୋଲି ସେ ଦାବି କରିଥିଲେ । ସେ କହିଥିଲେ, ‘ମୋବାଇଲ ଫୋନ, ଲ୍ୟାଣ୍ଡ ଲାଇନ କିମ୍ବା ହ୍ୱାଟ୍ସଆପ୍ରେ ମୁଁ କଥା ହେବା ସମୟରେ ଅନ୍ୟ କେହି ଜଣେ ମୋର ବାର୍ତ୍ତାଳପ ଶୁଣୁଛି । ହ୍ୱାଟ୍ସଆପ୍କୁ ମୁଁ ପୂର୍ବରୁ ସୁରକ୍ଷିତ ଭାବୁଥିଲି । କିନ୍ତୁ ବର୍ତ୍ତମାନ ଏହା ମଧ୍ୟ ଅସୁରକ୍ଷିତ ହୋଇଯାଇଥିବା ମନେକରୁଛି ।’