ରୋଗୀଙ୍କ ସେବା କରୁଥିବା ନର୍ସ ଆଇସିୟୁରେ

ବ୍ରିଟେନର ୱେଷ୍ଟ ମିଡଲ୍ୟାଣ୍ଡ ଅନ୍ତର୍ଗତ ୱାଲସଲ ମାନୋର ହସ୍ପିଟାଲରେ କରୋନା ଭାଇରସ୍ ସଂକ୍ରମିତ ବ୍ୟକ୍ତିଙ୍କ ଚିକିତ୍ସା କରୁଥିବା ଜଣେ ୩୬ ବର୍ଷୀୟା ନର୍ସ ଏବେ ସେହି ରୋଗରେ ଆକ୍ରାନ୍ତ ହୋଇ ଆଇସିୟୁରେ ଭର୍ତ୍ତି ହୋଇଥିବା ଜଣାପଡିଛି । ଏକଥା ଜଣାପଡିବା ପରେ ହସ୍ପିଟାଲରେ ଆତଙ୍କ ସୃଷ୍ଟି ହୋଇଛି । ସେଠାରେ କାର୍ଯ୍ୟରତ ଡାକ୍ତର, ନର୍ସ ଓ ଅନ୍ୟ ସ୍ୱାସ୍ଥ୍ୟକର୍ମୀଙ୍କ ଭିତରେ କୋକୁଆଭୟ ସୃଷ୍ଟି ହୋଇଛି । ସଂକ୍ରମିତ ନର୍ସଙ୍କ ଅବସ୍ଥା ଅତ୍ୟନ୍ତ ଗୁରୁତର ରହିଛି । ସେ ମୃତୁ୍ୟ ସହ ସଂଗ୍ରାମ କରୁଛନ୍ତି । ତିନି ସନ୍ତାନର ଜନନୀ ଅରିମା ନରସିନଙ୍କ ପରିବାର ଲୋକେ ଏ ବିଷୟରେ ଜାଣିବା ପରେ ଭାଙ୍ଗି ପଡିଛନ୍ତି । ଅରିମା ଦୀର୍ଘ ୧୬ ବର୍ଷ ହେଲା ଉକ୍ତ ହସ୍ପିଟାଲରେ କାର୍ଯ୍ୟ କରୁଥିଲେ । ଉକ୍ତ ହସ୍ପିଟାଲକୁ ଆସୁଥିବା ବହୁ ରୋଗୀଙ୍କୁ ସେ ବିନା ଦ୍ୱିଧାରେ ଚିକିତ୍ସା କରି ଭଲ କରିବାରେ ସକ୍ଷମ ହୋଇଛନ୍ତି । କିନ୍ତୁ ଚିକିତ୍ସା କରିବା ଭିତରେ ସେ କେତେବେଳେ ଏହି ଘାତକ ମହାମାରୀର କବଳରେ ପଡିଯାଇଥିଲେ ନିଜେ ଜାଣିପାରି ନଥିଲେ । ୧୦ ଦିନ ତଳେ ପ୍ରଥମେ ତାଙ୍କୁ ଜ୍ୱର ହୋଇଥିଲା । ସେ ଏହାକୁ ହେୟ ଭାବି ନେଇଥିଲେ । ଧିରେ ଧିରେ ଜ୍ୱର ବଢ଼ିବା ସହ ମୁଣ୍ଡବିନ୍ଧା ଓ ଶରୀର ପୀଡା ହେଲା । ତଥାପି ସେ ଏହାକୁ ଅଣଦେଖା କରିଥିଲେ । ସେ ବିଶ୍ୱାସ କରିନେଇଥିଲେ ଯେ କରୋନା କେବଳ ବୟସ୍କ ବ୍ୟକ୍ତିଙ୍କୁ ହିଁ ଟାର୍ଗେଟ କରିଥାଏ । ହେଲେ ସେ ପ୍ରକୃତ କଥା ଜାଣିବା ବେଳକୁ ବହୁ ବିଳମ୍ବ ହୋଇଯାଇଥିଲା । ପ୍ରାୟ ୫ ଦିନ ପରେ ଅବସ୍ଥା ଗୁରୁତର ହେବାରୁ ହସ୍ପିଟାଲରେ ଭର୍ତ୍ତି ହୋଇଥିଲେ । ଦୁଇଦିନ ତଳେ ପରୀକ୍ଷାରୁ ସେ କରୋନା ସଂକ୍ରମିତ ବୋଲି ଜଣାପଡିଥିଲା । ତଥାପି ହସ୍ପିଟାଲର ଡାକ୍ତର ଓ ନର୍ସମାନେ ଅରିମାଙ୍କର ସେବା ଜାରି ରଖିଛନ୍ତି । ଏହି ହସ୍ପିଟାଲରେ ଦୁଇଜଣ କରୋନା ସଂକ୍ରମିତ ବ୍ୟକ୍ତିଙ୍କର ମୃତୁ୍ୟ ଘଟିଛି । ମାର୍ଚ୍ଚ ୧୨ରେ ଜଣେ ୮୦ ବର୍ଷୀୟା ମହିଳା ଓ ମାର୍ଚ୍ଚ ୧୬ରେ ଜଣେ ୭୫ ବର୍ଷୀୟ ବ୍ୟକ୍ତି କରୋନା ସଂକ୍ରମିତ ହୋଇ ଏଠାରେ ଚିକିତ୍ସାଧୀନ ଥିବା ବେଳେ ପ୍ରାଣ ହରାଇଥିଲେ ।