ପ୍ରେମ ବଡ଼ ନା’ ବନ୍ଧୁତ୍ୱ?

ପ୍ରେମ ବଡ଼ ନା’ ବନ୍ଧୁତ୍ୱ? ପାଞ୍ଚ ଜଣ ସାଙ୍ଗଙ୍କ ଭିତରେ ଏମିତି ଏକ ଘଟଣାକୁ ନେଇ ପ୍ରସ୍ତୁତ ହୋଇଛି ଓଡ଼ିଆ ସିନେମା ‘ଚାଲ୍ ଟିକେ ପ୍ରେମ କରିବା’ । ଦେବକୀ ଫିଲ୍ମସର ଦ୍ୱିତୀୟ ଅବଦାନରେ ନିର୍ମିତ ଏହି ଚଳଚ୍ଚିତ୍ରର ଟ୍ରେଲର୍ ନିକଟରେ ସୋସିଆଲ୍ ମିଡିଆରେ ରିଲିଜ୍ ହୋଇ ଲୋକପ୍ରିୟତା ସାଉଁଟି ଚାଲିଛି । ଏଥିରେ ୫ଟି ଗୀତ ରହିବା ସହ ଏହାର ନୃତ୍ୟ ସଂଯୋଜନା ଓ ସୁଟିଂ ବହୁତ ସୁନ୍ଦର ହୋଇଥିବା ପ୍ରଯୋଜନା ସଂସ୍ଥା ପକ୍ଷରୁ କୁହାଯାଇଛି । ଗୀତିକାର ପଞ୍ଚାନନ ନାୟକ ଓ ନିର୍ମଳ ନାୟକ ଗୀତ ରଚନା କରିଛନ୍ତି । ଗାଇଛନ୍ତି ହୁ୍ୟମାନ୍ ସାଗର, ତପୁ ମିଶ୍ର, ପ୍ରଜ୍ଞା ହୋତା, ସତ୍ୟଜିତ, ଅଭିଜିତ ମିଶ୍ର ଓ ଅଭିଜିତ ମଜୁମଦାର । ସଙ୍ଗୀତ ନିଦେ୍ର୍ଧଶନା ଦେଇଛନ୍ତି ବିଭୂତି ଭୂଷଣ ଗଡ଼ନାୟକ । ସିନେମା ରିଲିଜ୍ ନେଇ କୌଣସି ତାରିଖ ଧାର୍ଯ୍ୟ ହୋଇନଥିବାବେଳେ ଏଇ ଅକ୍ଟୋବରରେ ପୂଜା ବଜାରରେ ବାଜା ବଜାଇବା ଲକ୍ଷ୍ୟରେ ଥିବା ଜଣାପଡ଼ିଛି । ଏହାର ପ୍ରଯୋଜନା ଭାର ସମ୍ଭାଳିଛନ୍ତି ଚିନ୍ମୟୀ ପ୍ରିୟଦର୍ଶିନୀ । ସେ ଏଥିରେ ଅଭିନୟ ବି କରିଛନ୍ତି । ପୂର୍ବରୁ ସେ ଫିଲ୍ମର ପ୍ରଯୋଜନା ସାଙ୍ଗକୁ ଅଭିନୟ କରିସାରିଛନ୍ତି । ସିନେମାର ମୁଖ୍ୟ ଭୂମିକାରେ ଦେବରାଜ, ଚିନ୍ମୟୀ ଓ ଲିପ୍ସା ପ୍ରମୁଖ ଅଭିନୟ କରିଛନ୍ତି । ଅନ୍ୟାନ୍ୟ ଭୂମିକାରେ ପ୍ରଜ୍ଞା, ସଲିଲ ମିତ୍ର, ଗୁଡ୍ଡୁ, ସୁଶୀଲ, ଲକ୍ଷ୍ମୀପ୍ରିୟା, ରବି, ଭବାନୀ, ପୁପିନ୍ଦର, କାଳୀଚରଣ, ରଞ୍ଜିତା ପାଣିଗ୍ରାହୀ, ବିରେନ ମିଶ୍ର ଓ ଗୁଲୁଆ ପ୍ରମୁଖ ରହିଛନ୍ତି । ସିନେମାର କାହାଣୀ ଦେବକୀ ସାହୁ ଏବଂ ସଂଳାପ ଆଶୁତୋଷ ବାରିକ ଲେଖିଥିବା ବେଳେ ଧୀରେନ୍ ସାହୁ କ୍ୟାମେରା ପରିଚାଳନା କରିଛନ୍ତି । ଚିତ୍ରନାଟ୍ୟ ଓ ନିଦେ୍ର୍ଧଶନା ଭାର ସମ୍ଭାଳିଛନ୍ତି ସରୋଜକାନ୍ତ । ପୂର୍ବରୁ ସେ ୫ଟି ଚଳଚ୍ଚିତ୍ରରେ ନିଦେ୍ର୍ଧଶନା ଦେଇଛନ୍ତି । ଯାହା ଦର୍ଶକୀୟ ଆଦୃତି ଲାଭ କରିଛି । ଆଶା ତାଙ୍କର ଏ ସିନେମା ବି ଦର୍ଶକଙ୍କ ମନକୁ ଛୁଇଁବ ।