ଅଙ୍ଗନଓ୍ବାଡି କେନ୍ଦ୍ରରେ ପ୍ରସ୍ତୁତ ଡାଲମାରୁ ବାହାରିଲା ମୃତ ଝିଟିପିଟି

ଆନନ୍ଦପୁର: କେନ୍ଦୁଝର ଜିଲ୍ଲା ହାଟଡ଼ିହି ବ୍ଲକ୍ ଢେଙ୍କା ଅଙ୍ଗନଓ୍ବାଡି କେନ୍ଦ୍ରରେ ଘଟିଛି ଅଘଟଣ। ଅଙ୍ଗନଓ୍ବାଡି ଶିଶୁଙ୍କ ପାଇଁ ରନ୍ଧା ହୋଇଥିବା ଡାଲମାରୁ ମୃତ ଝିଟିପିଟି ବାହାରିବାକୁ ନେଇ ଅଭିଭାବକ ମହଲରେ ଉତ୍ତେଜନା ପ୍ରକାଶ ପାଇଛି । ପ୍ରସ୍ତୁତ ଡାଲମାକୁ ଅଙ୍ଗନଓ୍ବାଡି ଶିଶୁ, ଶିଶୁମନାଙ୍କର କିଛି ମା’, ଅଙ୍ଗନଓ୍ବାଡି କର୍ମୀ ଓ ପାଚିକା ଖାଇଥିଲେ।
ଅଙ୍ଗନଓ୍ବାଡି କର୍ମୀଙ୍କ ଖାଦ୍ୟ ଥାଳିରୁ ଝିଟିପିଟି ବାହାରିବା ପରେ ଘଟଣା ଜଣାପଡ଼ିଥିଲା। ଏନେଇ ଅଭିଭାବକ ମହଲରେ ଉତ୍ତେଜନା ପ୍ରକାଶ ପାଇଥିଲା । ତୁରନ୍ତ ୧୪ ଜଣ ଶିଶୁଙ୍କ ସମେତ ଅଙ୍ଗନଓ୍ବାଡି କର୍ମୀଙ୍କୁ ଆନନ୍ଦପୁର ଡାକ୍ତରଖାନାରେ ସ୍ବାସ୍ଥ୍ୟ ପରୀକ୍ଷା କରାଯାଇଛି। ବର୍ତ୍ତମାନ ସୁଦ୍ଧା ଡାଲମା ଖାଇଥିବା କାହାରି ଦେହରେ କୌଣସି ପାର୍ଶ୍ଵ ପ୍ରତିକ୍ରିୟାର ଲକ୍ଷଣ ନଥିବାରୁ ଡାକ୍ତର ସେମାନଙ୍କୁ ଅବଜରଭେସନରେ ରଖିଥିବା କହିଛନ୍ତି।