ଅଳିଆ ଗଦାରେ ଫିଙ୍ଗି ଦେଲେ ପେଟି ପେଟି ସିରିଞ୍ଜ

ଜୟପୁର,(ବି.ବି.ନୁ୍ୟଜ୍): ଅଳିଆ ଗଦାରେ ପଡିଛି ପେଟି ପେଟି ଇଂଜେକସନ ସିରିଞ୍ଜ ଓ ନିଡିଲ୍ । ପଲ୍ସ ପୋଲିଓ ଲାଗି ୟୁନିସେଫ ଦେଇଥିବା ଏହି ହାଇପୋଡର୍ମିକ ସିରିଞ୍ଜକୁ ବ୍ୟବହାର କରାନଯାଇ ଫିଙ୍ଗି ଦିଆଯାଇଛି । ଏଥିସହ ପଲ୍ସ ପୋଲିଓ ଲେଜର, ଖାତା ଏବଂ ସ୍ୱାସ୍ଥ୍ୟ ବିଭାଗର କେତେକ ଚିଠି ଓ ବହି ବି ଫିଙ୍ଗାଯାଇଛି । ଏଣେତେଣେ ସିରିଞ୍ଜ ଓ ଛୁଞ୍ଚି ପଡିଥିବାରୁ ଏହାର ଅପବ୍ୟବହାର ହେବାର ସମ୍ଭାବନା ରହିଛି ।
ଉପଖଣ୍ଡ ଚିକିତ୍ସାଳୟ ପରିସରରେ ଥିବା ପୁରୁଣା ପଲ୍ସ ପୋଲିଓ ସେଣ୍ଟର(ପିପିସି) ଆଗରେ ଏଭଳି ଦୃଶ୍ୟ ଦେଖିବାକୁ ମିଳିଛି । ଶବ ବ୍ୟବଚ୍ଛେଦ ଗୃହ ପାଖରେ ଥିବା ଅଳିଆ ଗଦାରେ ପଡିଛି ଏହି ଅବ୍ୟବହୃତ କାଚ ସିରିଞ୍ଜ ଏବଂ ଛୁଞ୍ଚି । ରି-ପ୍ରଡକ୍ଟିଭ୍ ଆଣ୍ଡ ଚାଇଲ୍ଡ ହେଲ୍ଥ ପ୍ରକଳ୍ପ ଲାଗି ଏହି ସିରିଞ୍ଜ ଚାଇନାରୁ ଆସିଥିଲା । ପ୍ରତ୍ୟେକ ସିରିଞ୍ଜ ହେଉଛି ୨ ମିଲି ବିଶିଷ୍ଟ । ଉତ୍ତରପ୍ରଦେଶ ଗାଜିଆବାଦ୍ର ଗ୍ଲୋବାଲ ସ୍ପିନ୍ ୱେଭ୍ ଲିମିଟେଡ୍ ନାମକ କମ୍ପାନି ଏହାର ଯୋଗାଣକାରୀ ସଂସ୍ଥା । ଲାଲ୍ ରଙ୍ଗର ଗୋଟିକିଆ ଆଟା ପ୍ୟାକ୍ରେ ରହିଛି ସିରିଞ୍ଜଗୁଡିକ । ପ୍ରତି ପେଟିରେ ରହିଛି ୨୫ଟି ଲେଖାଏଁ ସିରିଞ୍ଜ୍ । ଉପରେ ଲେଖାଯାଇଛି ଏହି ୨ ମିଲି ସିରିଞ୍ଜ୍ ପୋଲିଓ ଟୀକାକରଣ ବେଳେ ହାଇପୋଡର୍ମିକ୍(ଚର୍ମ ତଳେ ଦିଆଯିବା) ବ୍ୟବହାର ଲାଗି ଉଦ୍ଧିଷ୍ଟ । ଏହାସହ ଅଳିଆ ଗଦାରେ ପଡିଛି ୨୬ ନମ୍ବର ଷ୍ଟେନ୍ଲେସ୍ ନିଡିଲ୍(ଛୁଞ୍ଚି) । ଗୋଟିଏ ଗୋଟିଏ ପ୍ଲାଷ୍ଟିକ ବାକ୍ସରେ ରହିଛି ୧୨ଟି ଲେଖାଏଁ ଛୁଞ୍ଚି । ଲୁୟର ଫିଟିଙ୍ଗ୍ ଯୋଗ୍ୟ ଏହି ଛୁଞ୍ଚିଗୁଡିକ ହାଇପୋଡର୍ମିକ ବ୍ୟବହାର ଲାଗି ଉଦ୍ଧିିଷ୍ଟ । ଯାହାର ବ୍ୟାଚ୍ ନମ୍ବର ହେଉଛି ୦୭-୫୧୫-୦୨ । କିଛି ଛୁଞ୍ଚି ବାକ୍ସ ଭିତରେ ଥିବାବେଳେ ଆଉ କିଛି ଏଣେତେଣେ ପଡି ରହିଛି । ଏଥିସହ ପଲ୍ସ ପୋଲିଓ ଡକୁ୍ୟମେଣ୍ଟ, ଲେଜର୍, ଇଣ୍ଟେନ୍ସିଫାଏଡ୍ ପଲ୍ସ ପୋଲିଓ ଇମୁ୍ୟନାଇଜେସନ ଟାଲି ସିଟ୍ ସହ ଅନେକ ଅବ୍ୟବହୃତ ଉଇଖିଆ ଖାତା ଓ ବହି ପଡିଛି ।
ଏ ସମ୍ପର୍କରେ ସେଠାରେ କାମ କରୁଥିବା କେତେକ ଶ୍ରମିକଙ୍କୁ ପଚାରିଥିଲୁ । ସେମାନେ କହିଥିଲେ, ପୁରୁଣା କୋଠାର ପୁନରୁଦ୍ଧାର ଚାଲିଛି । ସେମାନଙ୍କୁ ଘର ଭିତରେ ଥିବା ଅଳିଆ ଫିଙ୍ଗିଦେବା ଲାଗି କୁହାଯାଇଥିଲା । ଘର ସଫା ପରେ ରଙ୍ଗ ଦିଆଯିବ ବୋଲି ଠିକାଦାର କହିଥିଲେ । ଅଳିଆ ଭିତରେ କ’ଣ ଅଛି ସେମାନେ କେମିତି ଜାଣିବେ । ଯାହା ଆଦେଶ ମିଳିଲା, ସେମାନେ କରିଛନ୍ତି । ଖୋଲାମେଲାରେ ଏଗୁଡିକ ପଡିଥିବାରୁ ଜନସାଧାରଣଙ୍କ ଲାଗି ବିପଦ ଡାକି ଆଣିପାରେ । ରାତି ହେଲେ ଏଠାରେ ଅସାମାଜିକଙ୍କ ଆଡ୍ଡା ଜମୁଥିବାରୁ କିଛି ବି ହୋଇପାରେ । ଅପରାଧୀମାନେ ସିରିଞ୍ଜ ଓ ଛୁଞ୍ଚିର ଅସଦ୍ ବ୍ୟବହାର କରିପାରନ୍ତି । ଅପରାଧିକ କାର୍ଯ୍ୟକଳାପରେ ବିନିଯୋଗ କରାଯାଇପାରେ । ଏଠାରେ ପ୍ରଶ୍ନ ଉଠୁଛି, ଏହି ଅବ୍ୟବହୃତ ସିରିଞ୍ଜ ଏବଂ ଛୁଞ୍ଚିକୁ ଖୋଲାମେଲାରେ ଫିଙ୍ଗିବା ଲାଗି କିଏ ନିଦେ୍ର୍ଧଶ ଦେଲା । ପୋଲିଓ ଦାୟିତ୍ୱରେ ଥିବା କର୍ମଚାରୀ ଏଗୁଡିକୁ ନଷ୍ଟ ନକରି ଅଳିଆ ଗଦାରେ ଫିଙ୍ଗିବାକୁ କେମିତି କହିଲେ । ଡାକ୍ତରଖାନା କର୍ତ୍ତୃପକ୍ଷ ମଧ୍ୟ ଏ ବାବଦରେ କେମିତି କିଛି ଜାଣି ପାରିଲେ ନାହିଁ । ଏହାଯୋଗୁ ଯଦି କିଛି ଅଘଟଣ ଘଟେ ସେଥି ଲାଗି କିଏ ଦାୟି ରହିବେ?