ଧୁଲଧୁଲାରେ ହତ୍ୟାକାଣ୍ଡ:ଶ୍ୱଶୁର ମୃତ, ବହୂ ଗୁରୁତର

ଉଲୁଣ୍ଡା,(ବି.ବି.ନୁ୍ୟଜ୍): ଉଲୁଣ୍ଡା ଥାନା ଧୁଲଧୁଲା ଗାଁରେ ଏକ ହତ୍ୟାକାଣ୍ଡ ଘଟିଛି । ଏହି ଘଟଣାରେ ଶ୍ୱଶୁରର ମୃତୁ୍ୟ ହୋଇଥିବା ବେଳେ ବହୂ ଗୁରୁତର ହୋଇ ସୋନପୁର ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି । ତେବେ ହତ୍ୟାକାଣ୍ଡର କାରଣ ସ୍ପଷ୍ଟ ହୋଇନାହିଁ । ଘଟଣାସ୍ଥଳରୁ ଏକ ଟାଙ୍ଗିଆ, ରକ୍ତ ଭିଜା କିଛି କପଡା ପୁଲିସ ଜବତ କରିଛି । ମୃତ ଜଣକ ହେଲେ ଉକ୍ତ ଗାଁର ରାଜକୁମାର ଲୁହା ଏବଂ ଗୁରୁତର ଜଣକ ହେଲେ ଭୂମିସୁତା ଲୁହା ।
ସୂଚନା ମତେ ମୃତକଙ୍କ ସ୍ତ୍ରୀ ଭକ୍ତି ଲୁହା ଆଜି ଭୋରରେ ନୂତନ ଭାବେ ନିର୍ମାଣ କରିଥିବା ଘରକୁ ପାଣି ଦେବାକୁ ଚାଲିଯାଇଥିଲେ । କିଛି ସମୟ ପରେ ତାଙ୍କ ଜଣେ ପଡୋଶୀ ତୁମ ନାତୁଣୀ କାନ୍ଦୁଛି ବୋଲି ଖବର ଦେଇଥିଲେ । ତୁରନ୍ତ ସେଠାରୁ ଆସି ଦେଖିଲା ପରେ ତାଙ୍କ ସ୍ୱାମୀ ରାଜକୁମାର ଓ ବହୂ ଭୂମିସୁତା ରକ୍ତ ଜୁଡୁବୁଡୁ ଅବସ୍ଥାରେ ପଡିଥିବା ବେଳେ ଛୁଆଟି କାନ୍ଦୁଥିବା ଦେଖିଥିଲେ । ତୁରନ୍ତ ଉଭୟଙ୍କୁ ଆମ୍ବୁଲାନ୍ସରେ ଉଲୁଣ୍ଡା ଡାକ୍ତରଖାନାକୁ ଆଣିଥିଲେ । ସେଠାରେ ରାଜକୁମାରଙ୍କୁ ଡାକ୍ତର ମୃତ ଘୋଷାଣା କରିଥିବା ବେଳେ ଭୂମିସୁତାଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଜିଲ୍ଲା ଡାକ୍ତରଖାନାକୁ ପଠାଇ ଦେଇଥିଲେ । ତେବେ ଭୂମିସୁତାଙ୍କ ସ୍ୱାମୀ ଦୀର୍ଘ ୭ମାସ ହେବ ତାମିଲନାଡୁକୁ ଯାଇଥିବା ଜଣାପଡିଛି । ଖବରପାଇ ଉଲୁଣ୍ଡା ପୁଲିସ ଶବ ଜବତ କରିଛି । ଏନେଇ ମୃତକଙ୍କ ସ୍ତ୍ରୀ ଭକ୍ତି ତାଙ୍କ ସ୍ୱାମୀଙ୍କୁ ହତ୍ୟା ଏବଂ ବହୂଙ୍କୁ ଆକ୍ରମଣ ହୋଇଥିବା ନେଇ ଉଲୁଣ୍ଡା ଥାନାରେ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୁଲିସ ଏକ ହତ୍ୟା ମାମଲା ରୁଜୁ କରିଛି । ଘଟଣାସ୍ଥଳକୁ ଏସ୍ପି ଦେବିପ୍ରସାଦ ଦାସ, ବୀରମହାରାଜପୁର ଏସ୍ଡିପିଓ ଧୀରଜ ଚୋପଦାର, ଆଇଆଇସି ବିଦୂଭୂଷଣ ପୁଟା, ବଲାଙ୍ଗୀରରୁ ସାଇଣ୍ଟିଫିକ୍ ଟିମ ପହଂଚିଥିଲେ । ସେଠାରୁ ଏକ ଧାରୁଆ ଅସ୍ତ୍ର ଜବତ କରିଥିବା ବେଳେ ହତ୍ୟାକାରୀର କୌଣସି ସନ୍ଧାନ ପାଇନଥିଲେ । ତେବେ ହତ୍ୟାକାଣ୍ଡଟି କେଉଁ କାରଣକୁ ନେଇ ଘଟିଛି ତାହା ରହସ୍ୟ ଘେରରେ ରହିଛି । ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଥିବା ବେଳେ ତଦନ୍ତ ଜାରି ରହିଥିବା ଏସ୍ଆଇ ଏସ୍କେ. ଆଚାର୍ଯ୍ୟ ସୂଚନା ଦେଇଛନ୍ତି