ସ୍ୱାର୍ଥ ନିହିତ ଦ୍ୱନ୍ଦ୍ୱ: ଦ୍ରାବିଡ଼ଙ୍କୁ ମିଳିପାରେ କ୍ଲିନ୍ ଚିଟ୍

ନୂଆଦିଲ୍ଲୀ: ନ୍ୟାସନାଲ କ୍ରିକେଟ୍ ଏକାଡେମୀ (ଏନ୍ସିଏ)ର ନିର୍ଦ୍ଦେଶକ ଭାବେ ଯୋଗଦେବା ପରେ ରାହୁଲ ଦ୍ରାବିଡ଼ଙ୍କ ନାମରେ ସ୍ୱାର୍ଥ ନିହିତ ଦ୍ୱନ୍ଦ୍ୱ ଅଭିଯୋଗ ଆସିଥିଲା । ଏହାପରେ ବିସିସିଆଇ ଏଥିକ୍ ଅଫିସର ତାଙ୍କୁ ନୋଟିସ୍ ଜାରିକରିଥିଲେ ଏବଂ ଦୁଇ ସପ୍ତାହ ମଧ୍ୟରେ ଉତ୍ତର ଦେବାକୁ କହିଥିଲେ । ଆସନ୍ତା ସପ୍ତାହରେ ଏ ବିଷୟରେ ବିସିସିଆଇ ଲୋକପାଳ ନିଷ୍ପତ୍ତି ନେବେ । ଯାହା ଆଶା କରାଯାଉଛି ଦ୍ରାବିଡ଼ଙ୍କୁ କ୍ଲିନ୍ ଚିଟ୍ ମିଳିବ ।
ଦ୍ରାବିଡ଼ ଏନସିଏରେ ଯୋଗଦେବା ପୂର୍ବରୁ ଇଣ୍ଡିଆ ସିମେଣ୍ଟ ଗ୍ରୁପ୍ରେ ଉପ ସଭାପତି ରହିଥିଲେ । ସେଥିପାଇଁ ସେ ଯୋଗଦେବାରେ ବିଳମ୍ବ କରୁଥିଲେ । ବିସିସିଆଇ ପ୍ରଶାସକ କମିଟିର ପରାମର୍ଶ ଅନୁସାରେ ଶେଷରେ ଦ୍ରାବିଡ଼ ନିର୍ଦ୍ଦେଶକ ଭାବେ ଯୋଗଦେଇଥିଲେ । ଏହାପରେ ତାଙ୍କ ନାମରେ ଅଭିଯୋଗ ଆସିଥିଲା । ଫଳରେ ଏଥିକ ଅଫିସର ତାଙ୍କୁ ନୋଟିସ୍ ପଠାଇଥିଲେ ।
ବିସିସିଆଇ ଏଥିକ୍ ଅସିଫର ଡିକେ ଜୈନ ଦ୍ରାବିଡ଼ଙ୍କୁ ନୋଟିସ ଜାରି କରିବା ପରେ ପ୍ରଥମେ ଏ ବିଷୟରେ ମୁହଁ ଖୋଲିଥିଲେ ପୂର୍ବତନ ଅଧିନାୟକ ସୌରଭ ଗାଙ୍ଗୁଲି । ସେ ଟ୍ୱିଟ୍ କରି କହିଥିଲେ, ଭାରତୀୟ କ୍ରିକେଟର ନୂଆ ଫେସନ ….ସ୍ୱାର୍ଥ ନିହିତ ଦ୍ୱନ୍ଦ୍ୱ….ଖବର ସହ ଯୋଡ଼ି ରହିବାର ଏହା ସବୁଠୁ ବଡ଼ ଉପାୟ… ଭାରତୀୟ କ୍ରିକେଟରକୁ ଭଗବାନ ସହାୟ ହୁଅନ୍ତୁ ।’