୫ ହଜାର ଜରିମାନା ଦେଲେ ସରକାର

କଟକ,(ବି.ବି.ବ୍ୟୁରୋ): ଅଦାଲତରେ ଜବାବଦାଖଲ କରିନପାରିବାରୁ ଓଡିଶା ହାଇକୋର୍ଟ ରାଜ୍ୟ ସରକାରଙ୍କୁ ୫ ହଜାର ଟଙ୍କା ଜରିମାନାରେ ଦଣ୍ଡିତ କରିଥିଲେ । ଆଜି ଅଦାଲତଙ୍କ ନିର୍ଦ୍ଦେଶ ଅନୁଯାୟୀ ରାଜ୍ୟ ସରକାର ୫ ହଜାର ଟଙ୍କା ଜରିମାନା ଦାଖଲ କରିଛନ୍ତି । ଏହି ଟଙ୍କା ହାଇକୋର୍ଟ ବାର୍ ଆସୋସିଏସନ୍ର ଆଡଭୋକେଟ୍ ୱେଲ୍ଫେୟାର ଫଣ୍ଡରେ ରଖାଯିବ ବୋଲି ହାଇକୋର୍ଟ ଆଦେଶ ଦେଇଛନ୍ତି । ଓଡିଶା ଉପଭୋକ୍ତା ସଂଘ ପକ୍ଷରୁ ଆଗତ ମାମଲାର ଶୁଣାଣି କରି ଓଡିଶା ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ କେ.ଏସ୍. ଜାଭେରୀ ଏବଂ ବିଚାରପତି ଜଷ୍ଟିସ୍ କେ.ଆର. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି । ଏଥିସହ ରାଜ୍ୟରେ କେତେ ବେଆଇନ ନର୍ସିଂହୋମ୍ ଚାଲିଛି ସେ ସଂକ୍ରାନ୍ତରେ ସବିଶେଷ ରିପୋର୍ଟ ରଖିବାକୁ ଅଦାଲତ ରାଜ୍ୟ ସରକାରଙ୍କୁ ଆଦେଶ ଦେଇଛନ୍ତି ।
ମାମଲାରୁ ଜଣାଯାଇଛି ଯେ, ରାଜ୍ୟରେ ବେଆଇନ ନର୍ସିଂହୋମ୍ ଚାଲିଥିବାବେଳେ ଏସବୁ ବିରୋଧରେ କାର‌୍ୟ୍ୟାନୁଷ୍ଠାନ ପ୍ରାର୍ଥନା କରି ଓଡିଶା ଉପଭୋକ୍ତା ସଂଘ ହାଇକୋର୍ଟରେ ମାମଲା ରୁଜୁ କରିଥିଲା । ହାଇକୋର୍ଟ ଏହି ମାମଲାରେ ଜବାବଦାଖଲ ଲାଗି ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ । ୨୦୦୭ ସେପ୍ଟେମ୍ବର ୧୮ ତାରିଖରେ ରାଜ୍ୟ ସରକାରଙ୍କ ପକ୍ଷରୁ ହାଇକୋର୍ଟରେ ଏକ ରିପୋର୍ଟ ଦାଖଲ କରାଯାଇଥିଲା । ଏଥିରେ କୁହାଯାଇଥିଲା ଯେ, ରାଜ୍ୟରେ ୧୧୬୯ଟି ଅଣପଞ୍ଜିକୃତ ନର୍ସିଂହୋମ୍ ରାଜ୍ୟରେ ଚାଲିଛି । ଏଥିସହ ରାଜ୍ୟ ସରକାର ଆହୁରି କହିଥିଲେ ଯେ, ଖୁବ୍ଶୀଘ୍ର ରାଜ୍ୟରେ କ୍ଲିନିକାଲ ଏଷ୍ଟାବ୍ଲିଷ୍ଟମେଣ୍ଟ ଆକ୍ଟ ଲାଗୁ ହେବ । ଏହି ନିୟମ ଲାଗୁହେଲେ ଅଣ ପଞ୍ଜିକୃତ ନର୍ସିଂହୋମ୍ ବିରୋଧରେ ଅଙ୍କୁଶ ଲଗାଯାଇ ପାରିବ । ସେହିପରି ପ୍ରତ୍ୟେକ ଜିଲ୍ଲାରେ ଏକ ଟାସ୍କଫୋର୍ସ ମଧ୍ୟ ଗଠନ କରାଯାଇଥିଲା ବୋଲି କୁହାଯାଇଥିଲା । ଏହି ସମୟରେ ହାଇକୋର୍ଟ ରାଜ୍ୟରେ ପିଏନ୍ଡିଟି ଆକ୍ଟ କିପରି କାର‌୍ୟ୍ୟ କରୁଛି ସେ ସଂକ୍ରାନ୍ତରେ ଜବାବ ରଖିବାକୁ ଆଦେଶ ଦେଇଥିଲେ । କିନ୍ତୁ ସେବେଠାରୁ ରାଜ୍ୟ ସରକାର ଏ ନେଇ କୌଣସି ଜବାବ ରଖିନଥିଲେ । ଦୀର୍ଘଦିନ ଧରି ଜବାବ ନରଖିବାରୁ ହାଇକୋର୍ଟ ରାଜ୍ୟ ସରକାରଙ୍କ ଉପରେ ୫ ହଜାର ଟଙ୍କା ଜରିମାନା କରିଥିଲେ । ଆଜି ରାଜ୍ୟ ସରକାର ଏହି ଜରିମାନା ଅର୍ଥ ଦାଖଲ କରିଛନ୍ତି । ଆବେଦନକାରୀଙ୍କ ପକ୍ଷରୁ ଏହି ମାମଲାକୁ ଆଇନଜୀବୀ ଦିଲ୍ଲୀପ କୁମାର ମହାପାତ୍ର, ଅରୁଣ କୁମାର ସାହୁ, ଦେବୀପ୍ରସାଦ ମହାପାତ୍ର ପରିଚାଳନା କରୁଛନ୍ତି ।ା ଦେଲେ ସରକାର