ସାନ ଭାଇର ହାତୁଡି ମାଡ଼ରେ ଭାଇ-ଭାଉଜ ଗୁରୁତର

ପାଟଣା : କେନ୍ଦୁଝର ଜିଲ୍ଲା ପାଟଣା ଥାନା ମାଛଗଡ଼ ଗାଁରେ ଘଟିଛି ଅଭାବନୀୟ ଘଟଣା । ସାନ ଭାଇର ହାତୁଡି ମାଡ଼ରେ ବଡ଼ ଭାଇ ଓ ଭାଉଜ ଗୁରୁତର ହୋଇଛନ୍ତି । ଏନେଇ ବଡ଼ଭାଇ ନୀଳେନ୍ଦ୍ର ପାଟଣା ଥାନାରେ ସାନ ଭାଇ ଶରତଙ୍କ ନାମରେ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ସୋମବାର ସକାଳେ ଉଭୟ ସ୍ୱାମୀ ସ୍ତ୍ରୀ, ନିଜ ବିଲାତି ବାଡ଼ିରେ ପାଣି ଦେଉଥିଲେ । ଏହି ସମୟରେ ସାନ ଭାଇ ଶରତ ଆସି ବାପା ମାଙ୍କୁ ଗାଳିଗୁଲଜ କରିଥିଲା । ଏହାକୁ ନୀଳେନ୍ଦ୍ର ଙ୍କ ପତ୍ନୀ ରତ୍ନମଞ୍ଜରୀ ବିରୋଧ କରିବାରୁ ତାଙ୍କୁ ହାତୁଡିରେ ଆକ୍ରମଣ କରିଥିଲା ।ବଡ଼ଭାଇ ନିଳେନ୍ଦ୍ର ଛଡ଼ାଇବାକୁ ଚେଷ୍ଟା କରିବା ସମୟରେ ମଧ୍ୟ ହାତୁଡି ଆକ୍ରମଣର ଶିକାର ହୋଇଥିଲେ । ଫଳରେ ନୀଳେନ୍ଦ୍ରଙ୍କ ମୁଣ୍ଡରେ ଗଭୀର ଆଘାତ ଲାଗିଛି ।
ହାତୁଡି ମାଡ଼ରେ ରତ୍ନ ମଞ୍ଜରୀଙ୍କ ବାମ ହାତ ଭାଙ୍ଗିଥିବା ଜଣା ପଡ଼ିଛି। ଉଭୟ ଗୁରୁତର ଅବସ୍ଥାରେ କରଞ୍ଜିଆ ଉପଖଣ୍ଡ ଚିକିତ୍ସାଳୟରେ ଚିକିତ୍ସିତ ପରେ ପାଟଣା ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।