ପୋଲିସ – ସରପଞ୍ଚଙ୍କ ସମନ୍ୱୟ ବୈଠକ

{ ଜଗତସିଂହପୁରରୁ ରାକେଶ କୁମାର ରାୟଙ୍କ ରିପୋର୍ଟ } : ଜଗତସିଂହପୁର ଟାଉନ ଥାନା ପ୍ରାଙ୍ଗଣରେ ଏକ ପୋଲିସ – ସରପଞ୍ଚ ସମନ୍ୱୟ ବୈଠକ ପୋଲିସ ତରଫରୁ ଆୟୋଜନ କରାଯାଇଥିଲା। ଏଥିରେ ଜଗତସିଂହପୁର ଥାନା ଅଧୀନସ୍ଥ ୩୩ ଗୋଟି ପଞ୍ଚାୟତ ରୁ ୨୪ ପଞ୍ଚାୟତ ର ସରପଞ୍ଚ ଯୋଗଦେଇଥିଲେ। ପୋଲିସ ତରଫରୁ ଥାନା ଆଇଆଇସି, ଅତିରିକ୍ତ ଆଇଆଇସି ଏବଂ ଅନ୍ୟ ଷ୍ଟାଫ୍ ମାନେ ଉପସ୍ଥିତ ଥିଲେ। ଏହି ବୈଠକରେ ପୋଲିସ – ସାଧାରଣ ଜନତା ଙ୍କ ସମ୍ବନ୍ଧିତ ବିଷୟବସ୍ତୁ ଉପରେ ଆଲୋଚନା ହୋଇଥିଲା। ବିଶେଷତ୍ଵ ଭାବରେ ଚଳିତ ପୂଜା- ପାର୍ବଣ ଋତୁରେ ଆଇନ୍-ଶୃଙ୍ଖଳା ପରିସ୍ଥିତି ର ଆଶୁ ସମାଧାନ। ମାଜିଷ୍ଟ୍ରେଟଙ୍କ ଅନୁମତି ଅନୁଯାୟୀ ମେଳଣ ଏବଂ ଭଷାଣୀ ଯାତ୍ରା ନିଜ ପଞ୍ଚାୟତ ଅଞ୍ଚଳରେ ଥିବା ପୂଜା କମିଟି ଗୁଡିକୁ ପରାମର୍ଶ ଦେବାପାଇଁ ସରପଞ୍ଚ ମାନଙ୍କୁ ଅନୁରୋଧ କରାଗଲା। ପ୍ରତ୍ୟେକ ପଞ୍ଚାୟତ ଅଞ୍ଚଳ ରେ ଅସାମାଜିକ ଯୁବକଙ୍କ ଆଡ଼ାସ୍ଥଳ ର ଠିକଣା, ସମୟ ନିଆଗଲା, ଯେଉଁ ଯାଗାକୁ ପୋଲିସ ପେଟ୍ରୋଲିଙ୍ ଗାଡ଼ି ନଜର ରଖିବ । ଏତଦବ୍ୟତୀତ ଗ୍ରାମାଞ୍ଚଳରେ ଚୋରା ମଦ କାରବାର, ମାଦକ ଦ୍ରବ୍ୟ କାରବାର ଉପରେ ଚଢ଼ାଉ ଏବଂ ଛେଳି ଚୋରି, ମନ୍ଦିର ଚୋରି, ଅନ୍ୟାନ୍ୟ ଅପରାଧିକ କାର୍ଯ୍ୟକଳାପକୁ ନିୟନ୍ତ୍ରଣ କରିବାରେ ସହଯୋଗ ବିଷୟରେ ଆଲୋଚନା ହୋଇଥିଲା।